ӨНГӨЛӨГ АЛБАНИ

Abstract

Тиймээ, хэрэгтэй байна. Нэг иргэнд ноогдох газар нутгийн хэмжээгээрээ дэлхийд хамгийн сийрэгхэнд ордог улсын маань нийслэл автомашины дугаарын хязгаарлалт үйлчилдэгийг арван таван толгойтой атгаалжин хар мангас хэмээвэл түүнийг дарах борвиороо бор эсгий цувуулсан хамуутай бор даагатай жаалхүүбидэнд хэрэгтэй байна.

Азийн цагаан дагина гэж нэгэн цагт дуурсагдаж байсан нийслэлийн маань нэрийг Утаанбаатар болтол нь өөрчилсөн агаарын бохирдлыг хорон санаат Жафар гэвэл түүнийг арилгах шидэт хивс хөлөглөсөн Аладдиныг дуудмаар байна.   

Нэг бол ардчилсан үндсэн хуультай хэмээн хөөрдөг биднийг хээл хахууль, хүнд суртал хөлдөө чирсээр авлигын түвшингээр дэлхийд 83 дээр аваачсныг Жокер гэж нэрийдвэл үүнийг устгаж чадах Батмэний тусламж үгүйлэгдэж байна. Эх орныхоо төлөө ихийг санаж, сурч хөдөлмөрлөж байх учиртай залуус маань өдөр тутмынхаа стресст хөтлөгдөн хар дарсыг хөнтрөн улмаар гэмт хэргийн золиос болж буйг ертөнцөд мандсан найман нартай зүйрлэвэл нэгээс бусдыг нь харваж дийлдэг эрхий мэргэн харваачийг өнөө цагт уримаар байна.