ХҮНИЙ ЭРХ, ЭРХ ЧӨЛӨӨ ТҮҮНИЙГ ХАНГАХ МЕХАНИЗМ

Abstract

Хүний эрх, эрх чөлөөг хангах ер нь хүний эрхийн тухай асуудал нь хүн төрөлхтөний олон зуун жилийн туршид байнга анхаарлын төвд байж гүн ухаан, шашин, улс төр, эрх зүй мөн түүнчлэн ёс зүйн чухал сэдэв байсаар иржээ.

Нийгмийн хөгжил дэвшлийн үе шат, нийгмийн анги, давхраа түүний доторхи хүчний харьцаа, хоорондын тэмцэл, түүх, соёлын хөгжлийн уламжлал зэрэг олон нөхцөл байдал, хүчин зүйлээс хамааран хүний эрхийн тухай асуудал нь янз бүрийн агуулга, хэлбэрээр илрэн гарч зарим үед түүний шашны агуулга нь түлхүү тодрон хөгжсөн байхад зарим үедээ гүн ухааны агуулга, хэлбэр илүү анхаарал татаж хөгжиж ирсэн байдаг байна.

Хүний эрх гэдэг нь олон талын өргөн хүрээг хамарсан ойлголт бөгөөд одоогийн бидний “хүний эрх” гэж ойлгож, судлаж, хөгжүүлж байгаа энэ судлагдахуун нь олон жилийн нөр их тэмцлийн үр дүнд бий болсон юм.